कल्याणच्या शिवाजी चौकात शिवसेनेची भव्य दहीहंडी; महाराष्ट्राचे उपमुख्यमंत्री एकनाथ शिंदे, डॉ. श्रीकांत शिंदेंना विशेष निमंत्रण

लाखोंची बक्षिसे, आकर्षक भेटवस्तू आणि गोविंदा पथकांचा थरार; कल्याणमध्ये दहीहंडीचा जल्लोष

कल्याण प्रतिनिधी: नारायण सुरोशी 

कल्याण शहरातील ऐतिहासिक शिवाजी चौकात यंदा शिवसेनेच्या वतीने भव्य दिव्य दहीहंडी उत्सवाचे आयोजन करण्यात येणार असून, या उत्सवात उपमुख्यमंत्री एकनाथ शिंदे आणि खासदार डॉ. श्रीकांत शिंदे यांना विशेष निमंत्रण देण्यात आले आहे अशी माहिती शिवसेनेचे कल्याण शहरप्रमुख रवी पाटील यांनी पत्रकार परिषदेत दिली. यंदाची दहीहंडी अधिक आकर्षक, उत्साहपूर्ण आणि भव्य स्वरूपात साजरी करण्यासाठी शिवसेनेच्या पदाधिकारी व कार्यकर्त्यांनी जोरदार तयारी सुरू केली आहे. शिवाजी चौकातील दहीहंडी उत्सव हा कल्याण शहरातील प्रमुख उत्सवांपैकी एक मानला जात असून, दरवर्षी शहरासह ग्रामीण भागातील अनेक गोविंदा पथके मोठ्या उत्साहाने या ठिकाणी सहभागी होत असतात. पत्रकार परिषदेत माहिती देताना रवी पाटील यांनी सांगितले की, गोविंदा पथकांसाठी लाखो रुपयांची बक्षिसे तसेच विविध आकर्षक भेटवस्तू देण्यात येणार आहेत. त्यामुळे यंदाच्या दहीहंडी उत्सवात सहभागी होण्यासाठी गोविंदा पथकांमध्ये विशेष उत्साह निर्माण झाला आहे. 

ग्रामीण भागातील गोविंदांची ही मोठी उपस्थिती

कल्याण शहरासह ग्रामीण भागातील अनेक नामांकित गोविंदा पथके शिवाजी चौकातील दहीहंडी सहभागी होतात. थरावर थर रचून मानवी मनोरे उभारण्याचा थरार आणि गोविंदांचा उत्साह पाहण्यासाठी नागरिकांची मोठी गर्दी होत असते. यंदाही हा उत्सव अधिक जल्लोषात आणि उत्साहपूर्ण वातावरणात पार पडेल, अशी अपेक्षा व्यक्त करण्यात येत आहे. 

वाहतूक कोंडी टाळण्यासाठी विशेष नियोजन

दहीहंडी उत्सवासाठी आणि होणारी नागरिकांची प्रचंड गर्दी लक्षात घेऊन वाहतूक कोंडी होऊ नये आणि कार्यक्रम शांततेत व सुरळीत पार पडावा, यासाठी रवी पाटील आणि शिवसेनेचे पदाधिकारी विशेष नियोजन करत असल्याची माहिती देण्यात आली. पोलीस प्रशासन, वाहतूक विभाग तसेच संबंधित यंत्रणांच्या समन्वयातून नागरिकांना कोणताही त्रास होऊ नये, यासाठी आवश्यक उपाययोजना करण्यात येणार असल्याचेही सांगण्यात आले.

शिवसैनिकांमध्ये नवा उत्साह

उपमुख्यमंत्री एकनाथ शिंदे आणि खासदार डॉक्टर श्रीकांत शिंदे यांच्या विशेष निमंत्रणामुळे शिवसेना कार्यकर्ते आणि पदाधिकाऱ्यांमध्ये नवचैतन्य निर्माण झाले आहे. दहीहंडी उत्सवाच्या आयोजनासाठी शिवसैनिकांनी जोरदार तयारी सुरू केली असून, शिवाजी चौकातील हा उत्सव यंदा कल्याणकारांसाठी विशेष आकर्षणाचा केंद्रबिंदू ठरणार असल्याची चर्चा आहे. भव्य आयोजन, लाखोंची बक्षिसे, गोविंदांचा थरार आणि प्रमुख नेत्यांच्या संभाव्य उपस्थितीमुळे कल्याणच्या शिवाजी चौकातील शिवसेनेची दहीहंडी यांना विशेष गाजण्याची चिन्हे आहेत.